Categoría: Novas

«E INDA é nova a Terra!», «SERRA aberta / inmensa antiga erencia!» e «VAISE vaise / o camiño
d´aire do aire polo aire / camiñando por un sitio aonde nunca foi naide…» son os versos que inspiraron os participantes do I Concurso de Fotografía dos Eidos que leva o nome de Federico García Cabezón, médico rural e fotógrafo amador, que durante décadas fotografou as montañas e a vida dos últimos labregos do Courel.

O xurado, formado polo propio Federico G. Cabezón, Branca Novoneyra e Miguel Anxo Lar, vén de fallar as fotografías gañadoras entre as seleccionadas polos seguidores das redes da Fundación Uxío Novoneyra, que emitiron 5942 votos sobre as 24 obras participantes nunha queda previa entre o 20 e o 29 de novembro.

TRES PREMIOS E UN ESPECIAL PARA COURELAOS

Daniel Irimia, Ángel González, Jacobo Martins son respectivamente os gañadores do primeiro, o segundo e o terceiro premio, mentres o premio especial para residentes foi para o veciño Arturo Sánchez.

A Fundación Uxío Novoneyra agradece a todos os participantes e parabeniza os catro gañadores por activar a interpretación visual da Serra do Courel orientando a mirada sobre as xentes, os lugares e as edificacións en diálogo mantido cos versos do poeta e, co fallo dos premios, anuncia a celebración dunha entrega de premios e dunha mostra presencial coas fotos gañadoras acompañadas dunha selección especial das obras que participaron no concurso.

1º premio -Daniel Irimia

2º premio Ángel González

3º premio – Jacobo Martins

Premio especial Courel – Arturo Sánchez

A exposición aloxada nas cortes da casa natal, sede da fundación que leva o seu nome, desprega unha ampla cronobiografía do poeta do Courel e unha escolma de poemas relacionados coa montaña, a flora e a fauna da serra oriental, os traballos e as festas da comunidade, a casa e a familia do autor e pecha con poemas emblemáticos coñecidos por milleiros de galegos como poema dun só verso «Chove para que eu soñe…».

A nivel visual presenta numeroso material do Arquivo da Fundación de diferentes épocas da vida do autor, cun apartado especial dedicado a fotos coloreadas e recuperadas para actualizar a referencia visual sobre a figura do escritor, tarefa que as redes da Fundación Uxío Novoneyra destacan de forma continuada.

«Uxío Novoneyra, Poeta da Terra» é un proxecto financiado pola Secretaría Xeral de Política Linguística a través do Fondo Xacobeo 21 de proxectos culturais co gallo da celebración do 90 aniversario do nacemento do poeta do Courel.

VISITAS GUIADAS EN HORARIO DE INVERNO

A exposición poderá visitarse, durante o inverno, os venres de 16:00 a 19:00 e os sábados e domingos de 10:00 a 14:00 e de 16:00 a 19:00. Para asistir é preciso contactar previamente co correo electrónico info@uxionovoneyra.com.

O proxecto que forma parte da iniciativa Laboratorios Ciudadanos Distribuidos do MediaLab Prado

O obxectivo deste laboratorio é a elaboración de documentos fundacionais nos que mulleres courelás entrevisten ás súas veciñas sobre a vida cotián. Interésanos coñecer a memoria das mulleres nos espazos público e privado. Queremos que nos transmitan coñecementos sobre a vida cotián: os traballos e os coidados, o lecer das festas e outras celebracións, tamén queremos coñecer máis sobre os topónimos, o saber popular, a escola; e preguntarlles, finalmente, sobre a emigración e o despoboamento que forman parte da historia da comunidade durante os últimos tres séculos. Por último, tamén queremos que recuperen feitos esquecidos ou os restos da memoria durmida ou silenciada pola comunidade.  

Imos comezar o traballo de arquivo recollendo unha pequena mostra da memoria cotián das mulleres da serra. O Courel é unha serra da Galicia oriental, unha montaña da provincia de Lugo onde viven 1024 habitantes, 494 son mulleres cunha idade media de máis de 58 anos.

Interésanos favorecer a construción dunha memoria diversa e implicar no proxecto a mulleres de idades e pobos distintos para tecer un arquivo de memoria que impulse un futuro en igualdade, onde o coñecemento non se perda, afianzando saberes, referencias e referentes de proximidade que tezan unha rede a través do recoñecemento dos saberes entre as mulleres do Courel.

Quen pode participar e para que?

Poden participar as mulleres residentes no Courel que lles interese facer parte desta iniciativa e participantes doutros Laboratorios Ciudadanos Distribuídos do MediaLab Prado que lles interese implicarse no acompañamento do proceso de recollida e arquivo da memoria das mulleres do Courel.

Cando e onde apuntarse?

Ata o 10 de novembro no mail arquivo@uxionovoneyra.com ou chamando ao teléfono de contacto +34 659 888 709

Como era vivir no Courel cando eras nena?
Nieves Neira en El Progreso