Categoría: Novas

Esta sesión é a terceira do ciclo Lecturas Habitadas. Sesións de biblioterapia para mulleres do Courel.

Que libros leremos?

Extractos de obras moi dispares de Maria Gabriela Llansol, Eva Méndez do Roxo, Adília Lopes, Nieves Neira e algún texto sorpresa.

Um Arco Singular – Livro de Horas II de Maria Gabriela Llansol (Assírio & Alvim, 2010)

Onde vais, drama-poesia? de Maria Gabriela Llansol (Relógio D’Agua Editores, 2000)

A mullher-a-dias de Adília Lopes (2002)

Embernallúas de Eva Méndez do Roxo (Urutau, 2022)

O feitizo de Maruja Roca de Nieves Neira (aCentral Folque, 2020)

Obxectivo da sesión:

Di Maria Gabriela Llansol que “un dos efeitos do texto e permitir descobrir a linhagem a que se pertence, como o romance permitia descobrir o personagem que cada leitor desempenhava no filme da vida”. Os libros, así entendidos, vertebran esa comunidade de referencias que nos axuda a entender o noso lugar no mundo. Porén, as inercias patriarcais fan que moitas voces de mulleres e das súas vivencias non cheguen a nós. A sesión tratará de nomear algúns deses silencios, da xenealoxía familiar ou da xenealoxía que inventemos para nós.

Desenvolvemento da sesión:

Esta terceira sesión de Lecturas Habitadas, desenvolverase en distintos eidos de Parada do Courel, aldea na que se atopa a Fundación Uxío Novoneyra. Se o tempo o permite, pola mañá leremos xuntas textos na aira, xantaremos na horta, e pola tarde seguiremos coas lecturas no interior da casa-museo acompañadas dunhas castañas asadas.

Nota: se algunha participante ten algún tipo de alerxia ou de tipo de dieta específica, por favor comentalo no momento da inscrición para que podamos telo en conta para o xantar.

Día: domingo 16 de outubro
Horario: 12:00 – 18.00

Onde?

Na sede da Fundación Uxío Novoneyra (Parada do Courel).

Quen guía a sesión?

Nieves Neira

Quen pode participar?

Mulleres de todas as idades interesadas na lectura.

Como podo participar?

É unha actividade gratuíta.

A organización facilitará os textos ás participantes.

Ofertamos un máximo de 12 prazas. As inscricións deben formalizarse no correo info@uxionovoneyra.com. No texto do correo facilitaranse os seguintes datos: nome e apelidos, DNI, enderezo e teléfono.

Comunicaremos por teléfono ás interesadas que acaden praza  e elaboraremos unha listaxe de agarda por orde de chegada das peticións.

Queres máis información sobre a actividade?

Chámanos ao teléfono +34 659888709

Lecturas habitadas. Sesións de biblioterapia para mulleres é unha actividade da Fundación Uxío Novoneyra dentro do marco do proxecto Book Power Erasmus+ que desenvolve accións de biblioterapia con mulleres vencelladas a espazos en risco de vulnerabilidade social en Francia, Italia e España.

• O festival de poesía e artes expandidas celebra este ano a súa  VII edición coa poesía de Lupe Gómez, Joseba Sarrionandía, Manolo Rivas, Pura Tejelo e José Luís Gallero e a música de Ruper Ordorika, Radio Océano e Clo Plas

• A serie fotográfica “Queimados” de Federico G. Cabezón ocupará o Souto da Rubial e desenvolverase un encontro profesional para impulsar laboratorios veciñais na contorna

Poetas de linguas de distintas nacións do Estado darán voz á palabra nesta edición da cita organizada pola Fundación Uxío Novoneyra na casa natal do poeta en Parada do Courel, que tamén contará coa música de Radio Océano, Ruper Ordorika, The Rimbaud Company, Clo Plas, entre outros, ademais da poesía escénica, audiovisuais e o xa clásico roteiro de avistamento de paxaros.

O Festival dos Eidos lembra un libro aberto e comunal e celebra os seus “lugares íntimos, os máis convividos, dos que se ten longa experiencia, hábito de longa presencia, os que un leva estampados dentro”, como os definía Novoneyra. Nesta edición serán a horta, o curral, a aira, a Casa-Escola e o Souto da Rubial —que forma parte do catálogo de Árbores Senlleiras de Galicia— os escenarios dunha cita que reivindica a paixón pola terra e a palabra poética expandida, salvaxe, escénica e en diálogo con outras artes.

Marcos García e Cinthia Mendoça desenvolverán un encontro formativo sobre cultura participada e laboratorios veciñais na Estación Científica de Seoane no que participarán membros de distintos centros culturais rurais de toda a provincia.

A homenaxe que cada ano se lle dedica a Carlos Oroza contará o venres 26 coa participación do poeta e tradutor Nacho Fernández Rocafort e do que foi o seu editor no selo vigués Elvira, Javier Romero. Branca Novoneyra conducirá este acto que lembra ao autor do emblemático poema Se prohíbe el paso, que consolidou a súa obra ‘Eléncar’ nas longas tempadas que viviu na casa de Novoneyra en Parada.

A poeta Nieves Neira presenta no souto Trenza, acompañada por Cris Vilariño e Olalla Caamaño, unha performance con poemas do seu libro Neve de Agosto. Con anterioridade, este xoves 18 de agosto ás 20:00 horas na Praza de Castelo de Becerreá, poderase desfrutar da acción que abre a programación expandida do festival que desborda as datas e os lugares da cita estival. Pola tarde do sábado 27 terá lugar no curral da Casa da Fonte o recital central con voces emblemáticas como Lupe Gómez, Joseba Sarrionandía e Manolo Rivas.

O domingo 28 a xornada comezará da man do ornitólogo Xabier Vázquez Pumariño cunha actividade que nunca falta: a ruta polos paxaros que poboan ‘Os Eidos’. Ademais, o festival acollerá un micro aberto para ler xuntos, público e artistas, o Libro do Courel que dá nome ao festival.

Enxeito, Ruper Ordorika, Radio Océano, Clo Plas, The Rimbaud Company, Xico de Cariño e Alberto Mvundi Trío, Dj Tristón e Sergio Canay darán música a esta edición. A Casa-Escola acollerá durante toda a fin de semana a presentación dos proxectos audiovisuais Os espazos en branco (Bruno Arias) e Lingua lázara (Pilar Astray).

O Festival dos Eidos forma parte da rede europea Litfest de festivais literarios en zonas illadas, e conta co apoio económico da Xunta de Galicia, da Agadic, e da Vicepresidencia da Deputación de Lugo. Nesta cita, o acto de apertura celebrará o trinta aniversario da exposición dos castiñeiros “Queimados”, serie fotográfica de Federico García Cabezón, pendurada no souto comunal da aldea de Parada que lembrará o pesar pola natureza queimada dunha serra que é un libro, ‘Os eidos’, obra que xira á volta deses lugares de pertenza, referencia física, literaria e social das terras altas da montaña luguesa. As entradas poden adquirirse aquí.

Comunicamos o nome dos participantes seleccionados para desfrutar da terceira edición das residencias internacionais «Ámeto Mítico» no Camiño de Santiago, un proxecto integrado dentro da programación «O Teu Xacobeo» da Xunta de Galicia.

Alessandro Burbank, Tamara Andrés, Ojo Taiye, Nuria Vil, Carlos Negro, Verónica Aranda e Mohamed Abdullah son as/os poetas escollidas/os para participar na experiencia de escrita en residencia de escrita que se celebrarán entre o 16 de setembro e o 3 de outubro do 2022.

Durante máis de 15 días as/os participantes peregrinarán entre Vilafranca do Bierzo e Santiago de Compostela dedicados a desenvolver composicións de temática xacobea que, posteriormente,  compartirán co alumnado de centros educativos sitos en distintos concellos da ruta francesa. Ao remate da residencia, a FUN compilará os textos creados nunha edición especial.

A experiencia ten como obxectivo dialogar coas tradicións literarias que, como a lírica provenzal e a mística sufí, chegaron ás nosas terras polo Camiño. Recuperar o ámeto mítico que imaxinou Novoneyra na súa obra homónima é a finalidade destas residencias de escrita que desexan reactivar a temática xacobea para a poesía actual e convidar ao recoñecemento entre as/os mozas/os do Primeiro Itinerario Cultural Europeo.

Felicitacións para as seleccionadas e seleccionados.

As residencias itinerantes «Ámeto Mítico» forman parte da programación cultural da Xunta de Galicia “O Teu Xacobeo”. Esta terceira edición está encadrada no proxecto BE(p)ART – GROW WITH ARTS, unha iniciativa financiada con cargo ao programa Europa Creativa da Comisión Europea. O obxectivo de BE(p)ART é achegar a creación literaria á poboación máis nova e crear novos públicos desde unha metodoloxía participativa e de traballo en rede.

Esta sesión é a segunda do ciclo Lecturas Habitadas. Sesións de biblioterapia para mulleres do Courel.

Que libros leremos?

Extractos de obras moi dispares de Marguerite Duras, Macha Méril, Hélène Bessette, Gala de Meira e algún texto sorpresa.

Biographie d’un sexe ordinaire de Macha Méril (Albin Michel, 2003)

On ne vit que deux fois de Hélène Bessette (Othello, 2018)

O amante de Marguerite Duras (Kalandraka, 2020)

La Entusiasta de Gala de Meira [pseudónimo de Cristina V Miranda] (Dosmanos, 2021)

Nota: algúns fragmentos que leremos pertencen a obras sen tradución publicada en galego, e no caso de Méril e Bessette tampouco en castelán, por iso a moderadora aportará a súa propia tradución dos textos ó galego xunto co orixinal en francés.

Obxectivo da sesión:

Empoderamento. Procurar incrementar a conciencia dunha mesma a través de lecturas de ficción autobiográfica. Lecturas compartidas que poderemos vincular ás nosas propias lembranzas e que amosan a loita entre o eu ideal e o ideal de seu.

Desenvolvemento da sesión:

Esta segunda sesión de Lecturas Habitadas, desenvolverase en distintos espazos de Parada do Courel, aldea na que se atopa a Fundación Uxío Novoneyra; pola maná presentarémonos e leremos xuntas textos na Aira, xantaremos entre castiñeiros, e pola tarde seguiremos coas lecturas e comezaremos a conectar as nosas lembranzas cos textos escollidos.

Nota: se algunha participante ten algún tipo de alerxia ou de tipo de dieta específica, por favor comentalo no momento da inscrición para que podamos telo en conta para o xantar.

A Fundación Uxío Novoneyra busca poetas interesados en facer o Camiño de Santiago para escribir poesía de temática xacobea

A Fundación Uxío Novoneyra convoca unha ducia (12) de residencias de escrita e peregrinación seguindo as rutas descritas en Arrodeos e Desvíos do Camiño de Santiago e outras rotas, libro póstumo do poeta Uxío Novoneyra.

Desta nova edición destaca a ampliación do cupo a 12 prazas co obxectivo de reforzar a proxección internacional do programa, a suma dunha etapa desde Vilafranca ao Cebreiro e o incremento de centros de ensino implicados na actividade.

As/os poetas interesadas/os en participar deberán enviar a documentación requirida pendurada na web uxionovoneyra.com/actividades/residencias antes do 30 de xullo ao correo ametomitico@uxionovoneyra.com.

Esta terceira edición as residencias itinerantes «Ámeto Mítico» enmárcase no proxecto BE(p)ART – GROW WITH ARTS, unha iniciativa financiada con cargo ao programa Europa Creativa da Comisión Europea e, provisionalmente, continúa un ano máis co apoio da programación «O teu Xacobeo» impulsada pola Xunta de Galicia.

Día: sábado 30 de xullo
Horario: 12:00 – 17:00

Esta sesión é a primeira do ciclo Lecturas Habitadas. Sesións de biblioterapia para mulleres do Courel.

Que libros leremos?

• Camuflaxe de Lupe Gómez (Chán da Pòlvora, 2017)
• FelizIdade de Olga Novo (Kalandraka, 2019)
• El País de las Ranas de Pina Rota Fo (Errata Naturae, 2019)
• El prado Rosinka de Gudrun Pausewang (Impedimenta, 2020)

Cal é o obxectivo da sesión?

Espertar a creatividade das participantes a través de lecturas que nos conectan coa vida agraria contada por autoras de diversas xeracións.

Como o conseguiremos?

Pola mañá escoitaremos e comentaremos versos, imaxes e sons. Leremos poemas nos Prados do Río e comeremos xuntas. Pola tarde, leremos fragmentos das novelas no Souto da Rubial e gardaremos as ideas inspiradoras das lecturas escollidas.

Onde?

Na sede da Fundación Uxío Novoneyra (Parada do Courel).

Quen guía a sesión?

Branca Novoneyra

Quen pode participar?

Mulleres de todas as idades interesadas na lectura.

Como podo participar?

É unha actividade gratuíta. 

A organización facilitará os textos ás participantes.

Ofertamos un máximo de 12 prazas. As inscricións deben formalizarse antes do 27 de xullo no correo info@uxionovoneyra.com. No asunto indicarase o título da sesión (Habitar a natureza salvaxe) e no texto do correo facilitaranse os seguintes datos: nome e apelidos, DNI, enderezo e teléfono. 

Comunicaremos por teléfono ás interesadas que acaden praza  e elaboraremos unha listaxe de agarda por orde de chegada das peticións.

Queres máis información sobre a actividade?

Chámanos ao teléfono +34 659888709

Lecturas habitadas. Sesións de biblioterapia para mulleres é unha actividade da Fundación Uxío Novoneyra dentro do marco do proxecto Book Power Erasmus+ que desenvolve accións de biblioterapia con mulleres vencelladas a espazos en risco de vulnerabilidade social en Francia, Italia e España.