Música e poesía atópanse da man de Uxía Senlle nesta homenaxe a Uxío Novoneyra, unha obra multidisciplinar na que a cantante pon voz ao poeta do Courel.

A obra preséntase nun formato libro-disco no que se inclúen os poemas seleccionados por Uxía; 16 cancións onde ecoan a muiñeira, o ragtime, os alalás e o reggae.

«A poesía de Uxío ten un ritmo interno que a fai moi adecuada para ser cantada», sostén Uxía, que decidiu colaborar de novo co multi-instrumentista brasileiro Sérgio Tannus «para que esta visión fose a máis actual e universal posíbel, colocando o acento na contemporaneidade e musicalidade da obra de Novoneyra».