Antoloxía poética da Escola Labrega luguesa: De Leiras Pulpeiro a Novoneyra é o resultado dun proxecto nado da colaboración entre Xose Lois García e o propio Uxío Novoneyra a comezo dos anos 90. Vinte anos despois a Fundación edita este volume  no que, a través de sete voces esenciais, perfílase unha creación poética singular íntimamente ligada á provincia de Lugo e o seu mundo rural.

O poeta e ensaísta Xose Lois García (Merlán, 1945) escolma e prologa os sete autores recollidos nesta antoloxía: Manuel Leiras Pulpeiro, Antonio Noriega Varela, Xosé Crecente Vega, Aquilino Iglesia Alvariño, Xosé María Díaz Castro, Manuel María e o propio Uxío Novoneyra.  Sete voces fundamentais da poesía galega que, como reza o prólogo, «teimaron en reconstruír ese monumento poético onde as intimidades labregas teñen un acento particular, cargado de amor e de misterio».

O libro, un dos primeiros números da colección Valumbo, reproduce na súa portada un gravado de Novoneyra que leva por título o Lobican.