Categoría: Uncategorized @gl

A Asociación Ibérica de Museos e Fundacións de Escritores renova a xunta directiva durante o seu encontro anual
A Asociación Ibérica de Museos e Fundacións de Escritores (ACAMFE), que agrupa 43 casas museo e fundacións da Península Ibérica, celebrou o seu 30º aniversario en Madrid con motivo do seu encontro anual. O encontro incluiu unha asemblea na Residencia de Estudantes na que se elixiu unha nova xunta directiva encabezada por Uxío Novo, secretario da Fundación Uxío Novoneyra, que asume a presidencia en substitución de Victoria Galán, directora da Casa Museo Benito Pérez Galdós. A nova dirección estará conformada por Marlene Oliveira da Fundación Cupertino de Miranda (Famaliçao) que continuará exercendo a vicepresidencia, Antonio Piñeiro da Fundación Curros Enríquez e Carlos Velo (Celanova) desempeñará o cargo de secretario, e Raúl Luís García da Fundación Gregorio Prieto (Valdepeñas) será o novo tesoureiro da institución. Ademais, Eva Jiménez da Casa Museo de Cervantes (Alcalá de Henares) e Ana Chaguaceda da Casa-Museo de Unamuno da Universidade de Salamanca serán vogais do órgano directivo da entidade que, desde hai tres décadas, agrupa institucións dedicadas ao coidado e divulgación de diversos legados e casas literarias no ámbito ibérico.
A nova xunta directiva de ACAMFE marcou como principais retos para esta nova etapa o impulso a proxectos como a creación dunha rede europea de museos de personaxes ilustres, a celebración do Día das Linguas Ibéricas, e o desenvolvemento de iniciativas formativas, de transformación dixital, internacionalización e sustentabilidade; aliñadas cos avances e retos no ámbito da xestión do patrimonio literario actual.

Encontro con Yolanda Díaz na Biblioteca Nacional
Un momento destacado do encontro foi a recepción da vicepresidenta do Goberno, Yolanda Díaz, que saudou aos participantes na Biblioteca Nacional durante a súa visita á exposición “Unamuno e a Política: Da Pluma á Palabra”. Na súa intervención, Díaz agradeceu o compromiso das casas museo e fundacións de escritores, destacando “o valor do seu labor na preservación e difusión do legado artístico e cultural”.

A delegación tamén tivo a oportunidade de visitar a Casa Museo Lope de Vega e puido gozar do recital dedicado a Vicente Aleixandre, Carmen Conde e Gloria Fuertes, musicado e interpretado pola cantante Ana Cuenca no Salón da Residencia de Estudantes, un lugar emblemático e vital ligado aos inesquecibles poetas da Xeración do 27.

O encontro contou ademais coa participación de delegacións internacionais, entre elas o Comité Mundial ICLCM de museos literarios, musicais e artísticos, a Asociación Italiana Casa della Memoria, a Asociación Portuguesa de Casas Museu, xunto á Asociación Colexial de Escritores, a rede Espais Escrits de promoción da lectura e estudo da literatura catalá e a rede RELIGA de Casas, Museos Fundacións e Espazos Literarios de Galicia.

28 de Xullo, O Courel

A tradutora e autora Roser Vernet atópase desfrutando da residencia “Escrita no Remoto” na Casa Museo Uxío Novoneyra en Parada (Folgoso do Courel). Este programa de residencias, que a Fundación Uxío Novoneyra celebra co apoio da Area de Cultura da Deputación de Lugo a través da Rede Museística, inicia neste mes a súa terceira edición entre a casa natal do poeta e o Pazo de Tor en Monforte de Lemos.

Tor e Parada son dous lugares estreitamente vinculados á obra do poeta do Courel e nas anteriores edicións do programa acolleu ás autoras Yolanda Castaño, Pamen Pereira e María Sánchez. Este ano a autora convidada é Roser Vernet, quen gañou o último Premi Ciutat de Barcelona na categoría Literatura en lingua catalana co seu primeiro libro “Lo ming del món”, un libro inclasificable que recolle un mosaico de vivencias entretecidas co seu lugar de pertenza.

Roser Vernet dirixe o Centre Quim Soler en El Molar (Priorat), unha asociación que traballa a prol do desenvolvemento integral da comunidade. O centro recolle o fondo do escritor Joaquim Soler Ferret e fomenta o estudo e difusión da súa obra. Por outra banda, é un espazo que vincula a literatura e o viño desde fai décadas e desenvolve o proxecto Priorat en Persona que convida a autores e autoras cataláns a escribir un diccionario literario da excepcional paisaxe do Priorat. As máis de corenta participantes durante oito edicións conviviron durante días dun xeito moi estreito con “adalids” (persoas que representan a experiencia viva do Priorat) quen lles facilitaron a escritura dun diccionario en proceso con máis de catrocentas palabras que nomean a Terra que os acolle. En cada edición bianual, os autores e as autoras retornan ao lugar para compartir os seus textos diante da comunidade educativa dos distintos colexios e institutos da comarca.

A Fundación Uxío Novoneyra convida a autora e tradutora catalana a escribir sobre a tamén excepcional paisaxe courelá e posteriormente compartir o escrito coas comunidades educativas da montaña. A sinerxia con proxecto Priorat en Persona foi o motor do convite para iniciar o diálogo co Centre Quim Soler e iniciar unha conversa literaria entre a escrita das terras do Priorat e dos eidos courelás.

Roser Vernet Anguera naceu no Priorat no ano 1955. Como moitas e moitos tivo que abandonar a comarca e vivir fóra do Priorat e do país. Retornou definitivamente a principios do século XXI. É adicta ás prácticas que xeran complicidades, ás grandes mesas compartidas e ás palabra e feitos que tecen e posibilitan modos dignos de habitar os lugares que nos acollen.