2000 m² de horta rodean a Casa da Fonte, un espazo natural de  mazairas, nogueiras, cereixais, roseiras, loureiros, carnabudos e outras moitas especies autóctonas.

Este é  o escenario do Festival dos Eidos,  que se celebra cada mes de agosto reunindo poesía, música, danza e natureza.

Desde aquí gózase dunha mirada privilexiada sobre os montes do Courel,  especialmente desde a solaina, que olla  cara á Pinza e a Lomba.

A horta conecta a través dun carreiro co Souto da Rubial, o souto do poeta, un claro na fraga courelá que da acubillo a ducias de castaños centenarios. O conxunto forma parte do Catálogo de árbores senlleiras da Xunta de Galicia.