Categorías
Novas

Celebrada con éxito a primeira edición do centenario europeo do Ulises en Lugo

O comité organizador desta programación internacional reunido onte felicitou á cidade de Lugo e á Fundación Uxío Novoneyra pola calidade do programa conmemorativo da publicación do libro celebrado na cidade amurallada entre o 19 e o 21 de maio baixo o título de “Ulises pasea Lugo”.

© Adra Pallón

A obra magna de James Joyce, publicada en 1922, mudou para sempre a nosa concepción da literatura, os seus límites e capacidades expresivas. A cultura galega foi a primeira das da Península Ibérica en reaccionar ante a súa aparición cunha tradución fragmentaria realizada por Otero Pedrayo e publicada en 1926 na revista Nós, un feito que pon de manifesto a especial atención entre a cultura galega e a irlandesa xa naquela altura baixo o paradigma do celtismo.

© Adra Pallón

Cen anos despois, a celebración do centenario ao seu paso por Lugo co proxecto Europa Creativa a grande escala “Ulysses European Odissey” a finais do pasado mes de maio revisou e actualizou o impacto da obra de Joyce na nosa cultura nunhas xornadas definidas polo seu carácter multidisciplinar e que contaron, ademais, cunha elevada asistencia do público local e de toda Galicia.

Os directores do centenario para toda Europa, os irlandeses Sean Doran e Liam Browne, presentes en toda a programación luguesa, amosaron o seu entusiasmo tanto pola calidade e intensidade do programa de actuacións como pola descuberta feliz dunha cidade que lles resultaba practicamente descoñecida e á que definiron como “o mellor escenario posible para a celebración do capítulo VIII do libro, Lestrygonians, centrado na comida e a gastronomía”.

© Adra Pallón

Neste sentido, cómpre lembrar que a produción, distribución e consumo de alimentos tiveron un especial protagonismo nesta primeira edición do “Ulises en Lugo”, sendo o Mercado Municipal de Lugo o entorno escollido para a inauguración das xornadas cunha peza de arqueoloxía sonora a cargo da Fundación Legar, composta por Martina Ferradás e Xavier Blanco. Álvaro Villasante do restaurante Paprica, ofreceu unha actualización á galega do petisco de pan con queixo gorgonzola e viño de Borgoña que Harold Bloom degusta no libro. No simposio “Lestrigóns: a nosa relación diaria coa produción de alimentos”, a concelleira de Mercados Cristina López defendeu a vixencia deste modelo como garantía de sostibilidade e de acceso a produtos de proximidade dunha alta calidade. Alberto González Villar, xerente da Praza de Abastos de Ourense, Adrián Lago, de Queixos Castelo e Pablo Lodeiros, de adegas Lodeiros, e Álvaro Villasante participaron tamén nestas mesas sobre a produción e consumo de alimentos con identidade propia.

© Adra Pallón

Na parte escénica, a Asociación 3Monos realizou unha interpretación danzada do capítulo VIII do Ulysses que foi especialmente valorada polos representantes da UEO alí presentes. A Orquestra Filarmónica de Lugo, dirixida por Iván Martínez Sabio, executou un repertorio ad-hoc que contou cunha grande asistencia de público.

© Adra Pallón

No que atinxe ao plano literario, Xavier Queipo e Antón Vialle expuxeron a súa experiencia como tradutores do Ulysses ao galego nunha conferencia dirixida por Francisco Castro, director de Galaxia, na que tamén tomou a palabra o escritor galego Isaac Xubín. Cid Cabido, Keith Payne, María Linheira, Lois Diéguez e Felipe Senén analizaron na xornada do sábado, moderada por Alberto Lema, a relación da cultura galega co libro de Joyce e coa cultura irlandesa en xeral.

© Adra Pallón

Os recitais poéticos, a maioría deles recuperando a fórmula en desuso do brinde como palaba pública, correron da man de Antón Reixa, Yolanda Castaño, Lois Pérez, Sara Plaza, Genaro da Silva, Luis Valle e Isaac Xubín e foron apoiados de xeito entusiasta por Bodegas Martín Codax, Cervexas Alhambra e Bodegas Lodeiros, sucedéndose nos espazos referenciais de Lugo, como as inmediacións da Praza do Campo, a Rúa Nova, a Tinería e a Porta de San Pedro e nutrindo de público os establecementos hostaleiros próximos.

© Adra Pallón

No Museo Provincial de Lugo inaugurouse, así mesmo, unha exposición pictórica a cargo do pintor local Jesús Otero, cunha persoal plasmación da leitura do capítulo “Lestrigóns”.

© Adra Pallón
Categorías
Novas

Ulises pasea Lugo

A “Ulysses European Odissey”, programación europea bienal que conmemora o centenario do Ulises de James Joyce, obra capital da literatura europea, e que se celebra en 18 cidades europeas diferentes, aterra en Lugo entre os días 19 a 21 de maio, a única cidade do estado español participante, cun completo programa literario, artístico e gastronómico baseado no capítulo VIII “Lestrygonians”, centrado na literatura e a gastrocultura.

Leopold Bloom pasea no libro polas rúas de Dublin o 16 de xuño de 1904 e para nun pub ao mediodía a tomar un petisco de pan e queixo gorgonzola, acompañado por un viño de Borgoña.

A comida, o viño, o paseo e a literatura serán tamén os protagonistas da celebracion  “Ulises en Lugo”, que contará cun programa descentralizado por toda a cidade con 20 actos diferentes nos que participarán preto de 40 diferentes axentes culturais e gastronómicos entre escritoras, poetas, tradutores, bailarinas, músicos, cociñeiros, académicas ou labregos, entre outros perfís de referencia nos diferentes eidos que abrangue este programa cultural internacional.

Nestas xornadas analizarase a historia da tradución do Ulysses ao galego; a literatura gastronómica; a estreita relación entre Galicia e Irlanda; as súas semellanzas culturais, artísticas e mesmo históricas; e a influencia do libro de Joyce, cume do modernismo literario do século pasado, na literatura galega actual.

Así mesmo, o festival organizará un simposio no que se analizará o vizoso sector gastrocultural de Lugo e Galicia, dende a produción, ata a distribución e o desfrute da nosa gastrocultura, referente europea. Cociñeiros, produtores, académicos e labregos serán os encargados de explicar, en primeira persoa, as súas achegas a un factor cultural de primeira magnitude, como é a alimentación.

As actuacións da Filarmónica de Lugo, a reconstrución sonora da Praza de Abastos de Lugo cara a 1920 e unha interpretación danzada do capítulo VIII a cargo da compañía 3Monos forman parte tamén do programa dunhas xornadas que contará coa participación de Antón Reixa, Yolanda Castaño, Marica Campo, Xavier Queipo, Cid Cabido, María Linheira, Francisco Castro, Genaro da Silva, Isaac Xubín, Keith Payne, Sara Plaza, Lois Diéguez ou da poeta e veterinaria María Sánchez, entre moitos outros.

Ulysses European Odyssey é o primeiro programa Europa Creativa de cooperación cultural a grande escala no que participa a cidade de Lugo, en colaboración coa Fundación Uxío Novoneyra.

O programa do festival pódese descargar aquí.